ეროვნული ბანკი სესხებისა და დეპოზიტების მიმდინარე ტენდენციების შესახებ მონაცემებს აქვეყნებს.
სებ-ის ინფორმაციით, 2023 წლის მარტისთვის, კომერციულ ბანკებს 44.45 მლრდ ლარის სესხი აქვთ გაცემული (ბანკთაშორისი სესხების გარდა), რაც წინა თვესთან შედარებით, 9.46 მლნ ლარით (0.02%-ით) არის შემცირებული (გაცვლითი კურსის ეფექტის გარეშე, 0.81%-ით გაიზარდა).
აღსანიშნავია, რომ ამ პერიოდში გაიზარდა ეროვნული ვალუტით გაცემული სესხების მოცულობა 144.87 მლნ ლარით, ხოლო უცხოური ვალუტით გაცემული სესხების მოცულობა 154.32 მლნ ლარით შემცირდა (გაცვლითი კურსის ეფექტის გარეშე, 1.07%-ით გაიზარდა).
რეზიდენტი იურიდიული პირებისათვის 2023 წლის თებერვლის ბოლოს, კომერციულ ბანკებს ეროვნული ვალუტით გაცემული ჰქონდათ 7.35 მლრდ ლარის (წინა თვესთან შედარებით 0.12%-ით ნაკლები), ხოლო უცხოური ვალუტით 12.32 მლრდ ლარის (წინა თვესთან შედარებით 0.38%-ით ნაკლები) მოცულობის სესხი (გაცვლითი კურსის ეფექტის გარეშე, 1.45%-ით მეტი).
2023 წლის თებერვლის განმავლობაში 0.18%-ით, ანუ 42.04 მლნ ლარით გაიზარდა რეზიდენტი შინამეურნეობების სექტორის დაკრედიტების მოცულობა და თებერვლის ბოლოსათვის 23.84 მლრდ ლარი შეადგინა.
2023 წლის თებერვლის ბოლოსათვის, სესხების ლარიზაციის კოეფიციენტი 55.35%-ს შეადგენს. ერთ თვეში ლარიზაციის მაჩვენებელი გაიზარდა 0.34%-ით (გაცვლითი კურსის ეფექტის გამორიცხვით, შემცირდა 0.12 პროცენტული პუნქტით).
