საქართველოში სავაჭრო ქსელებში ხახვის მარაგები ამოიწურა, ახალი პროდუქცია კი ვეღარ შეიტანეს.
ამის მიზეზად სავაჭრო ობიექტები პროდუქციის სიძვირეს ასახელებენ. სავაჭრო ქსელ „ორი ნაბიჯში“ BRG-ის უთხრეს, რომ ხახვი მისი მაღალი საბითუმო ფასის გამო ვერ შეიტანეს.
დეფიციტის გამო ხახვის გასაყიდი ფასი გაიზარდა საკოლმეურნეო ბაზრებშიც. სადაც კილოგრამის ღირებულება 5-6 ლარია.
ხახვის დეფიციტი გლობალური პრობლემაა. დეფიციტის ერთ-ერთი მიზეზი მსხვილ მწარმოებელ ქვეყნებში მარაგების ამოწურვა გახდა.
მაგალითად, საქართველოში ხახვის იმპორტი 2023 წლის მარტში ოთხჯერ ნაკლები იყო, ვიდრე 2022 წლის მარტსა და 2023 წლის თებერვალში. ქართველ იმპორტიორებს უჭირთ ხახვის მთავარი მიმწოდებლის – თურქეთის ჩანაცვლება, რომელმაც ხახვის ექსპორტზე შეზღუდვები დააწესა საკუთარ ბაზარზე სტაბილური ფასების შენარჩუნების მიზნით.
ბოლო პერიოდში ხახვის გაძვირების გამო საქართველოში, განსაკუთრებით ქვემო ქართლში, ბევრმა ფერმერმა კარტოფილის ნაცვლად ხახვი დათესა.
თუმცა, ფერმერებს ასეთი გადაწყვეტილების მიღება ხშირად უძნელდებათ. შესაძლოა, მოსავლის აღების შემდეგ ბაზარზე სიტუაცია საპირისპიროდ შეიცვალოს, ხახვის სიჭარბე გაჩნდეს, რაც მისი ფასის კლებას გამოიწვევს. ამ შემთხვევაში ფერმერი ხარჯებს ვერ დაფარავს და იზარალებს.
ბოლო პერიოდში საქართველოში ხახვის იმპორტი ძირითადად რუსეთიდან ხორციელდება, ასევე, შემოდის აზერბაიჯანიდან.
