საქართველოს მთავრობამ ახალი აეროპორტის ასაშენებლად ვაზიანის ყოფილი აეროდრომის ტერიტორია შეარჩია.
ამის შესახებ პრემიერ მინისტრმა ირაკლი ღარიბაშვილმა დღეს განაცხადა. მისი თქმით, ვაზიანი საერთაშორისო კლასის აეროპორტის მშენებლობისთვის იდეალური იქნება.
ირაკლი ღარიბაშვილის განცხადებით, საბოლოო გადაწყვეტილებას შესაბამისი შესწავლის საფუძველზე მიიღებენ.
პრემიერ-მინისტრმა არსებული აეროპორტის გაფართოების საკითხზეც ისაუბრა. მისი თქმით, თბილისის საერთაშორისო აეროპორტის გაფართოების რესურსი შეზღუდულია, ამიტომ საჭიროა, ახალი აეროპორტის აშენება, „თუ გვინდა რომ გავხდეთ რეალურად რეგიონში საავიაციო ჰაბი”.
„ვიმსჯელეთ და მივედით იმ დასკვნამდე, რომ ჩვენ თუ გვინდა 20-30-50-წლიანი და თუნდაც 100-წლიანი პერსპექტივით ქვეყანაზე ვიზრუნოთ და ჩვენს მომავალ თაობებს დავუტოვოთ სათანადო ინფრასტრუქტურა და გამართული აეროპორტი, აუცილებელია ახალი ლოკაციის შერჩევა. ასეთი ლოკაცია, ასეთი ადგილი თბილისში არის, შეიძლება ითქვას, იდეალური ამ მიზნით, ვაზიანის ყოფილი აეროდრომი…
ჩვენი სურვილი არის ახლა, რომ ამ პროექტის შესასწავლად ჩამოვიყვანოთ საუკეთესო პროექტანტები, მშენებლები, არქიტექტორები, ჯერ კარგად შევისწავლოთ ეს ადგილი და ამის შემდეგ მივიღოთ საბოლოო გადაწყვეტილება…
ბოლო წლების განმავლობაში ვაკვირდებით, რომ ქვეყანაში მგზავრთა ნაკადის თითქმის 25%-იანი მატება გვაქვს, ყოველ წელს. რა თქმა უნდა, ეს ძალიან კარგია. საქართველოს აეროპორტებიდან ხორციელდება პირდაპირი ფრენები მსოფლიოს 58 ქალაქში და რეგულარული საჰაერო მიმოსვლა გვაქვს მსოფლიოს 31 ქვეყანასთან”, – განაცხადა ირაკლი ღარიბაშვილმა.
