აშშ-ის მრეწველობისა და უსაფრთხოების ბიურომ გამოაცხადა, რომ რუსეთსა და ბელორუსში $300-ზე მეტი ღირებულების ელექტროსაქონლის ექსპორტი იკრძალება.
აკრძალული ნივთების სიას, რომელსაც ე.წ. „ფუფუნების საგნების სანქციების სიასაც“ უწოდებენ, აშშ-ის კომერციის დეპარტამენტი დღეს გამოაქვეყნებს.
სმარტფონების გარდა, განახლებულ სიაში შედის – ტელევიზორები, პრინტერები, ხმის ჩამწერები, მტვერსასრუტები, ელექტრონული კალკულატორები, ვენტილატორები. სულ ჩამონათვალში 270-ზე მეტი დასახელების საქონელი შედის.
აშშ-ის ხაზინის მდივნის მოადგილემ, უოლ ადეიემომ, ამ კვირაში განაცხადა, რომ რუსეთი ნახევარგამტარებს იღებს მაცივრებიდან და მიკროტალღური ღუმელებიდან, რასაც სამხედრო აღჭურვილობაში იყენებს.
24 თებერვალს ევროკავშირის სპეციალურმა წარმომადგენელმა სანქციების საკითხებში დევიდ ო’სალივანმა განაცხადა, რომ ევროკავშირი, შეერთებული შტატები, დიდი ბრიტანეთი და სხვა მოკავშირეები იძიებენ ექსპორტის მკვეთრი ზრდის მიზეზებს რუსეთის მეზობელ ქვეყნებში. EBRD-მა აღნიშნა, რომ რუსეთში იმპორტი მკვეთრად გაიზარდა სომხეთიდან, ყირგიზეთიდან და თურქეთიდან.
