აშშ-მექსიკის საზღვარზე მიგრანტების ნაკადი მოულოდნელად შემცირდა,- ამის შესახებ აშშ-ის პრეზიდენტის – ჯო ბაიდენის ადმინისტრაციამ განაცხადა.
ადმინისტრაციის ინფორმაციით, საზღვრის გაკვეთის მსურველთა რაოდენობა ისე არ გაზრდილა, რასაც 12 მაისიდან, ტიტული 42-ის ვადის ამოწურვის შემდეგ ელოდებოდნენ. ბაიდენის ადმინისტრაცია ამას უკანონო შესვლისთვის ჯარიმების სისტემის აღდგენას უკავშირებს.
აშშ-ის შიდა უსაფრთხოების მდივანმა ალეხანდრო მაიორკიმ თქვა, რომ ახალი რეგულაციის ამოქმედების შემდეგ მიგრანტების რაოდენობა საზღვარზე 50%-ით შემცირდა.
ტიტული 42-ის რეგულაცია, რომელიც დონალდ ტრამპის პრეზიდენტობის დროს COVID-19-ის შეზღუდვის მიზნით იყო მიღებული, საშუალებას იძლეოდა, მიგრანტები გაეძევებინათ თავშესაფრის მიღების პროცესის გავლის გარეშე. თუმცა, მათთვის ჯარიმების დაკისრებას არ ითვალისწინებდა.
ბაიდენის ადმინისტრაციის მიერ 12 მაისიდან ამოქმედებული ახალი რეგულაცია კი მიგრანტებს ავალდებულებს, საიმიგრაციო შეხვედრა აპლიკაციის საშუალებით დანიშნონ ან თავშესაფარი მოითხოვონ იმ ქვეყნებში, რომლებსაც ისინი აშშ-ის საზღვრისკენ მიმავალ გზაზე გაივლიან.
თუ ისინი ამას არ გააკეთებენ და მათ შეერთებულ შტატებში არალეგალურად შესვლისას დააკავებენ, 5 წლით აეკრძალებათ აშშ-ში ხელახლა შესვლა, თუნდაც, ლეგალური გზით. სხვა დარღვევებისთვის გათვალისწინებულია პატიმრობაც.
„შეერთებულ შტატებში ჩასვლის კანონიერი, უსაფრთხო და მოწესრიგებული გზა არსებობს. ეს არის გზები, რომლებიც პრეზიდენტმა ბაიდენმა უპრეცედენტოდ გააფართოვა. თუ ადამიანი ამ კანონიერ გზებს არ გამოიყენებს, ამას მოჰყვება შესაბამისი შედეგი”, – განაცხადა მეიორკასმა.
რესპუბლიკელებმა, რომლებიც აშშ-ის წარმომადგენელთა პალატას აკონტროლებენ, განაცხადეს, რომ საზღვარზე მიგრანტების ნაკადის ზრდა ჯერ კიდევ წინაა.
პალატის უსაფრთხოების კომიტეტის რესპუბლიკელმა თავმჯდომარემ მარკ გრინმა განაცხადა, რომ აშშ-ის შიდა უსაფრთხოების მდივანმა ვერ თქვა სიმართლე და რეალურად„ამ კვირაში მიგრანტების მიერ იყო საზღვრის მეტი კვეთა, ვიდრე ნებისმიერ დროს, ნებისმიერ კვირას, ჩვენს ისტორიაში”.
