რუსული თვითმფრინავის მიერ ამერიკული დრონის შავ ზღვაში ჩამოგდების შემდეგ, აშშ-მა ახალი დრონი RQ-4 Global Hawk გაგზავნა. ამის შესახებ რადიო თავისუფლების პროგრამა „კრიმ.რეალიი“ Flightradar24-ზე დაყრდნობით წერს.
მანამდე რამდენიმე საათის განმავლობაში ამერიკული უპილოტო საფრენი აპარატი რუმინეთის საჰაერო სივრცეში დაფრინავდა.
ამერიკული მედია წერს, რომ ახალი უპილოტო აპარატი შავი ზღვის რაიონში MQ-9 Reaper-ის ჩამოვარდნის ადგილის დასათვალიერებლად და რუსეთის სამხედროების დასაკვირვებლად გაიგზავნა, რომლებიც წყალში დრონის ნამსხვრევებს ეძებენ.
ამერიკული დრონი 14 მარტს რუსულ თვითმფრინავთან შეჯახების შედეგად ჩამოვარდა. რუსეთის თავდაცვის სამინისტრომ განაცხადა, რომ ამერიკული დრონი გამორთული ტრანსპონდერებით დაფრინავდა, ხოლო სუ-27 თვითმფრინავის მფრინავებმა „აღკვეთეს ამერიკული MQ-9 უპილოტო საფრენი აპარატის მიერ საჰაერო სივრცის გამოყენების დროებითი რეჟიმის ტერიტორიის საზღვრების დარღვევა“.
რუსეთის ხელისუფლებამ და პენტაგონმა მომხდარს გაუთვალისწინებელი სიტუაცია უწოდეს. რუსეთის თავდაცვის მინისტრმა სერგეი შოიგუმ დღეს თვითმფრინავის პილოტებს სახელმწიფო ჯილდოები გადასცა.
