აშშ-ის უცხოური აქტივების კონტროლის ოფისმა (OFAC) სანქციების ახალი სია გამოაქვეყნა, სადაც შედის რუსეთის 25 ფიზიკური და რამდენიმე ათეული იურიდიული პირი, რომლებიც რუსეთს უკრაინასთან ომში ეხმარებიან. სია შეერთებული შტატების ხაზინის დეპარტამენტის ვებსაიტზე დღეს გამოქვეყნდა.
სანქციები დაუწესდათ რუს მილიარდერ ალიშერ უსმანოვთან დაკავშირებულ პირებსა და კომპანიებს. უსმანოვი უზარმაზარ ქონებას ფლობს ლითონებისა და სამთო მომპოვებელ, ტელეკომუნიკაციებისა და საინფორმაციო ტექნოლოგიების სექტორებში. უსმანოვი ვლადიმერ პუტინთან და დიმიტრი მედვედევთან დაახლოებული პირია. მას დასავლური მედია პუტინის ფავორიტ ოლიგარქად მოიხსენიებს. უსმანოვი, სანქციების მიუხედავად, მაინც ახერხებდა ფინანსური ტრანზაქციების განხორციელებას, ამიტომ შეზღუდვები ამჯერად შეეხება ყველა სუბიექტს, რომლებიც პირდაპირ თუ ირიბად მის სახელს უკავშირდება.
სანქციები დაეკისრება უსმანოვის და მისი პარტნიორების ბიზნესებს: Metalloinvest-ს, Megafon-ს, Ackermann Cement-ს, UESM Gold-ს, Fedorovskoye LLC-სა და სხვა კომპანიებს.
სანქცირებულთა შორის არიან რუსეთის ვიცე-პრემიერი მარატ ხუსნულინი და ტრანსპორტის ყოფილი მინისტრი და სახელმწიფო სატრანსპორტო სალიზინგო კომპანიის (STLC) აღმასრულებელი დირექტორი ევგენი დიტრიხი.
სანქციები შეეხო Rusatom Overseas-ს და ამ კომპანიის პრეზიდენტს – ევგენი პაკერმანოვსაც.
