სახელმწიფო აუდიტის სამსახურმა ჩაატარა აფხაზეთის მთავრობის და უწყების სამინისტროების მიერ 2020-2021 წლებში ავტოსატრანსპორტო საშუალებების მიღების, გამოყენებისა და მათზე გაწეული ხარჯების აუდიტი.
აფხაზეთის მთავრობის და მისი სტრუქტურების მიერ ბიუჯეტის არამიზნობრივ ხარჯვაზე მუდმივად არის საუბარი. მათ მუშაობაში დარღვევები წინა წლებშიც არაერთხელ გამოვლინდა.
აუდიტის შედეგად არაერთი ნაკლოვანება გამოვლინდა. აღრიცხვის დოკუმენტების შემოწმებით აღმოჩნდა, რომ უწყების მიერ ავტომობილების შეძენის გადაუდებელი აუცილებლობა არ არსებობდა. აფხაზეთის მთავრობის მაღალი გამავლობის ავტომობილის გადაუდებელი აუცილებლობით შესყიდვის ერთ-ერთ საფუძვლად საქართველოს მაღალმთიან რეგიონებში ხშირი მივლინებებს ასახელებს, თუმცა, ამის საჭიროება არ იყო.
მაღალი გამავლობის ავტომობილის ნაცვლად, ამავე კლასის მსუბუქი ავტომობილის შეძენის შემთხვევაში, დაახლოებით, 10 ათასამდე ლარი დაიზოგებოდა.
ავტომანქანის რემონტზე არამიზნობრივად დახარჯული სახსრები
აფხაზეთის უმაღლესი საბჭოს აპარატის ბალანსზე რიცხული ავტომანქანა ავტოსადგომზე დგომის დროს დაზიანდა, მაგრამ ამ შემთხვევის შესახებ სადაზღვევო კომპანიისა და საპატრულო პოლიციისთვის არ შეუტყობინებიათ და ავტომანქანა გარემონტდა საბიუჯეტო სახსრებით, რისთვისაც 1 700 ლარი გაიხარჯა.
აფხაზეთის მთავრობამ ეს ფაქტი იმით ახსნა, რომ მძღოლმა, მანქანის დაზიანების შესახებ ხელმძღვანელობას დაგვიანებით აცნობა, ამის გამო დამნაშავის დადგენა შეუძლებელი გახდა და უწყება იძულებული გახდა, ის ბიუჯეტიდან გაერემონტებინა.
ბევრად მეტი, 26 487 ლარია დახარჯული კიდევ ერთი სამსახურებრივი ავტომობილის – მერსედეს-ბენცის შეკეთებაზე, რაც ავტომანქანის შეძენის ღირებულების 41%-ია.
ავტომანქანების სათადარიგო ნაწილების შეძენა და სარემონტო სამუშაოების შესრულება არასრულყოფილად შედგენილი დეფექტური აქტების საფუძველზე, ზოგჯერ კი საერთოდ მათ გარეშე.ხდებოდა.
აღურიცხავი საწვავის ტალონები
აფხაზეთის მთავრობა დარღვევებით იყენებდა კიდევ ოთხ სამსახურებრივ ავტომობილს. ერთ-ერთი ავტომობილი მთავრობის აპარატს 2019 წლის ნოემბერში სავაჭრო-სამრეწველო პალატისგან გადაეცა, რომელიც მას 65 000 ლარად ჰქონდა შეძენილი.
ამ მანქანების მოძრაობის აღრიცხვის დოკუმენტს აუდიტმა ვერ მიაგნო. ასევე არ კონტროლდებოდა საწვავის ლიმიტი. იყო შემთხვევები, როცა თანამშრომლები მივლინებაში არ იყვნენ, მაგრამ საწვავს სახელმწიფოს ხარჯზე ასხამდნენ. აღრიცხვის დოკუმენტი ზოგ შემთხვევაში არ წარმოებდა, ხოლო დანარჩენ შემთხვევებში − დაიკარგა.
დოკუმენტაციის გარეშე გაიცემოდა ავტომანქანის რეცხვის ტალონები, ისე, რომ ხარჯის დამადასტურებელი საბუთი არ არსებობდა. ამის გამო ბიუჯეტიდან არამიზნობრივად 13 061 ლარზე მეტი დაიხარჯა.
ჩაშლილი ტენდერები და უხარისხოდ შესრულებული სამუშაო
აუდიტმა ასევე აჩვენა, რომ ტენდერში გამარჯვებულები კონკურენციის გარეშე ვლინდებოდა. ჩატარებული 13 ტენდერიდან 9-ში მხოლოდ ერთი პრეტენდენტი მონაწილეობდა. ამასთანავე, ხშირი იყო ტენდერების ჩავარდნის შემთხვევები, 2020-2021 წლებში აფხაზეთის ჯანდაცვის სამინისტროს გამოცხადებული 59 ტენდერიდან 13 არ შედგა.
აუდიტის სამსახური დოკუმენტში უთითებს, რომ 11 შემთხვევაში გამოვლინდა სხვადასხვა სახის დარღვევა, რაც ძირითადად უკავშირდებოდა სამუშაოების უხარისხოდ და არასრულად შესრულებას. ასეთ ობიექტებზე, 4100 ლარამდე სამუშაოების შესრულება არ დადასტურდა.
ასევე, ვერ დადგინდა, სად, რომელ ობიექტებზე ჩატარდა სადეზინფექციო სამუშაოები, რამაც ბიუჯეტიდან 107 750 ლარის არამიზნობრივად ხარჯვის რისკები შექმნა.
აუდიტის სამსხურმა მასალები საქართველოს გენერალურ პროკურატურას გადაუგზავნა. პროკურატურის ინფორმაციით, შესაძლო დანაშაულის ფაქტებზე აღძრულია სისხლის სამართლის საქმე და მიმდინარეობს გამოძიება.
