დღეს, 12 მაისს, შეერთებულ შტატებში ძალაში შედის ახალი რეგულაცია, რომელიც მექსიკიდან და სხვა მოსაზღვრე ქვეყნებიდან საზღვარზე გადასული მიგრანტებისთვის თავშესაფრის მიღების წესებს ამკაცრებს. შეზღუდვები, რომელუც Covid-19-თან დაკავშირებით დაწესდა, ცნობილია ტიტული 42-ის სახელით და რომელიც საზღვარზე მოქმედებდა, ვადა 11 მაისს ამოეწურა.
რას ითვალისწინებს ახალი რეგულაცია
ახალი რეგულაციის მიხედვით, არალეგალ მიგრანტებს, რომლებიც საკუთარი ქვეყნიდან ძალადობასა და გაუსაძლის პირობებს გაექცნენ, თავშესაფრის მოთხოვნის უფლება არ ექნებათ, თუ აშშ-ის მიმართულებით მიმავალ გზაზე სხვა ქვეყნებში არ ეცდებიან დაცვისა და დახმარების მიღებას ან თუ ისინი სხვა ნებისმიერი არალეგალური გზით ეცდებიან შეერთებულ შტატებში მოხვედრას.
ახალი რეგულაცია ასევე ითვალისწინებს მიგრანტის მონაცემების უფრო სწრაფ, უფრო ზუსტად, რამდენიმე დღეში დამუშავებას და მალევე დეპორტაციას, თუ ის თავშესაფრის მიღების აუცილებლობას ვერ დაამტკიცებს.
ამრიგად, ახალი შეზღუდვების შემოღება არის აშშ-ის მცდელობა, თავიდან აიცილოს მიგრაციის მოსალოდნელი ზრდა.
აშშ-ის მიგრაციის სამსახურს დროებით 500 თანამშრომელს დაუმატებენ ინტერვიუების ჩატარებაში დასახმარებლად, ხოლო პენტაგონმა 1500 სასაზღვრო პატრული გაგზავნა საზღვრის კონტროლის გასაძლიერებლად.
არალეგალი მიგრანტების გაძევება ცხადია, გაგრძელდება.
ახლა აშშ-ის ოფიციალური პირები უფრო მეტად დაეყრდნობიან ათწლეულების წინანდელ ტიტულ 8-ს, რომელიც მიგრანტების უფრო მკაცრ კონტროლს ითვალისწინებს. კერძოდ, საზღვრის უკანონოდ გადაკვეთისას, მათ შეერთებულ შტატებში ხელახლა შესვლა სულ მცირე, ხუთი წლით აეკრძალებათ.
ხოლო თუ ისინი საზღვრის გადაკვეთას ხელახლა შეეცდებიან, შესაძლებელია, სისხლის სამართლებრივი დევნა დაემუქროთ.
მიგრანტების უფლებების დამცველების ინფორმაციით, ტიტული 8-ით სასაზღვრო მოხელეები მიგრანტებს ტიტული 42-ის მოქმედების პერიოდშიც აკავებდნენ.
აშშ-ის საზღვარზე არალეგალურად გადამსვლელი მიგრანტების რიცხვი ყოველდღიურად 10 000-ს აჭარბებს.
აშშ-ის ადმინისტრაცია მათ შესაკავებლად მოსაზღვრე ქვეყნებში ახალი მიგრაციის ცენტრების გახსნას აპირებს.
