აზერბაიჯანი ბუნებრივი აირის უნგრეთში ექსპორტს იწყებს

აზერბაიჯანი უნგრეთისთვის ბუნებრივი აირის მიწოდებას მიმდინარე წლის მეოთხე კვარტალში დაიწყებს.

აზერბაიჯანიდან გაზის მიღების მიუხედავად, უნგრეთი უარს არ ამბობს რუსულ გაზზეც.

SOCAR-მა და უნგრულმა MVM Group-მა ხელშეკრულებას გაზის მიწოდებაზე ხელი 2 ივნისს მოაწერეს.

კონტრაქტის მიხედვით, მიწოდების მოცულობა 100 მილიონი კუბური მეტრი იქნება. 

გარდა ამისა, SOCAR-მა და MVM Group-მა განიხილეს თანამშრომლობა გაზსაცავების გამოყენებისა და თხევადი ბუნებრივი აირის (LNG) მიწოდების საკითხებზე.

უნგრეთის მხარის განცხადებით, გარიგება შეიძლება გახდეს გრძელვადიანი ხელშეკრულების საფუძველი, რომლის მიხედვითაც, აზერბაიჯანი უნგრეთს ყოველწლიურად 2 მილიარდ კუბურ მეტრამდე აირს მიაწვდის.

2022 წელს აზერბაიჯანმა გაზის ექსპორტი 18%-ით – 22,3 მილიარდ კუბურ მეტრამდე გაზარდა. ევროპაში ექსპორტმა 11,4 მილიარდი კუბური მეტრი (+39%) შეადგინა.

2023 წლისთვის აზერბაიჯანი სულ 24,5 მილიარდი კუბური მეტრი აირის ექსპორტს გეგმავს. აქედან, დაახლოებით 12 მილიარდი კუბური მეტრი ევროპამ უნდა მიიღოს.

ამჟამად ევროპაში აზერბაიჯანულ გაზს იტალია, საბერძნეთი, ბულგარეთი და რუმინეთი ყიდულობენ.