საქართველოში ავტომობილის კატალიზატორის რეალიზაციასთან და ექსპორტთან დაკავშირებით კონტროლი მკაცრდება.
კანონმდებლობაში ცვლილებები უნდა შევიდეს იმისთვის, რომ კატალიზატორების მოხსნა და მათი შემდგომი გასხვისება შეიზღუდოს.
შესაბამის ცვლილებებზე გარემოს დაცვისა და სოფლის მეურნეობის სამინისტრო მუშაობს.
კატალიზატორი ავტომობილის საკმაოდ ძვირად ღირებული ნაწილია. ის შეიცავს პალადიუმს, რომელიც პლატინის ჯგუფის ძვირფასი ლითონია და გამონაბოლქვს აკონტროლებს.
პალადიუმის მაღალი ფასის გამო ხშირად ავტომანქანიდან კატალიზატორს ხსნიან და ყიდიან. კატალიზატორის ამოღების შემდეგ ავტომობილის მავნე გამონაბოლქვი მატულობს.
ავტომობილის ძრავი საწვავის მოხმარების დროს გამოყოფს ნამწვ აირებს, რომლებიც შეიცავენ ისეთ მავნე ნივთიერებებს, როგორებიცაა ნახშირწყალბადი, ნახშირბადის მონოქსიდი და აზოტის ოქსიდი. ამ ნივთიერებების პირდაპირ გაფილტვრის გარეშე გარემოში მოხვედრა აბინძურებს გარემოს. კატალიზატორის უმთავრეს ფუნქციას წარმოადგენს მავნე ნივთიერებების გარდაქმნა შედარებით ნაკლებად მავნე ნივთიერებებად და ასევე გამონაბოლქვის პროცენტულობის შემცირება.
ქუჩებში საკმაოდ ბევრი ავტომობილი მოძრაობს კატალიზატორის გარეშე, ამიტომ აუცილებელი გახდა რეგულაციების შემოღება. როგორც გარემოს დაცვისა და სოფლის მეურნეობის მინისტრის მოადგილემ ნინო თანდილაშვილმა აღნიშნა, რეგულაციები გატარდება იმისთვის, რომ კატალიზატორის მოხსნამ და ჩაბარებამ აზრი დაკარგოს და ასევე, გარკვეული შეზღუდვები დაწესდეს შემდგომ ექსპორტზეც.
თბილისში ჰაერის ხარისხი უკვე დიდი ხანია, რაც სცდება ჰაერის დაბინძურების დასაშვებ ზღვარს. დედაქალაქში კვლავაც იმატებს ავტომობილების რაოდენობა და მათ შორის ისეთების, რომლებსაც კატალიზატორი არ აქვთ.
კვლევების თანახმად, დაბინძურებული ჰაერი იწვევს ასთმას ბავშვებში, გულ-სისხლძარღვთა დაავადებებსა და ფილტვის ფუნქციების დარღვევას. კიბოთი დაავადებულთა 10-20% სწორედ დაბინძურებული ჰაერის ინტენსიური შესუნთქვის გამო ავადდება.
